سلاااااااااااااامااااااااات....متخفش من العسكرى

حد فيكم بيقرا المصرى اليوم ؟

طيب حد فيكم بيقرا سلامات ؟؟

ركن شعر صغير كده فى الصفحها الأخيره بيكتبه على سلامه

شعر عامى بسيط وممتع فى نفس الوقت

هخلى الموضوع ده أرشيف لسلامات

ونبدأ بقصيده عدد النهارده

ماتخفش م العسكرى

كتب على سلامة ٢٦/ ١١/ ٢٠٠٨ماتخفش م العسكرى
م العتمة
م الأتوبيس
ومن إبليس
ماتخفش م بكرة
من الماضى
وإياك فى يوم
تحزن على الفاضى
وتعالى شوف الأسد
ف السيرك واتفرج
آخر مسخرة
مسطول وبيهرج
وف الغابة عامل عفريت
بص ع التعبان ف إيد حاوى
والقرد فى سلسلة قرداتى
سارح ع القهاوى
زى كتب الحواديت
بص ع الطبلة و ع الزمار
وشوف القط ويا الفار
وقولى فين الجد
وفين الهزار
دى الهزيمة بشرف
وده التعادل اللى بطعم الانتصار
وبص على شريط الأخبار
مفيش زيادة ف أسعار الدوا
الزمالك لسه بيحاول
والأهلى يبحث عن مهاجم أفريقى
شاطر ف ألعاب الهوا
وجريمة خيانة أمانة وشرف
لما الفينو أبو سمسم
يبقى ترف
بجد بجد
بلاش قرف
بص ع الهموم
لون الهدوم
شبه المطب
اللى ف أول طريق الفيوم
وفى طريق الواحات
بنعيد من تانى
نفس الحكايات
نفس التهمة
نفس المحكمة
ونفس القاضى
قوللى بذمتك
تفرق إيه قلعة الكبش
والدويقة
عن الزمالك والمعادى
بص كويس
بقولك
ملقيش عندك نشيد بلادى
بتاع الشيخ سيد درويش
واللا أنت لسه خايف
م العسكرى

انتظروا الباقى ....