حكومة مصر وشعبها......وعجبى علينا!!!!!!

تعالو بينا كده ندخل أي مصلحه حكوميه ولتكن السجل المدني ونشوف إيه اللي بيحصل جوه ...
ده مواطن مسكين عايز يطلع شهاده وفاه وده موظف حكومي عايز خمسه جنيه - رشوه عشان يطلعهاله .
- المواطن بوجهه اليائس وصوته البائس لموظف الحكومه : عايز أطلع شهاده وفاه لوالدي الله يرحمه - ودمعتين نازلين كده زعلان علي الحاج الوالد - ..
-الموظف بكبر فرعونين وببرود القطبين : وأنا أعرف منين إنه مات ؟, لازم تجيبلي راسه ..
- المواطن بدهشه المسكين وآلام اليتيم : بس والدي غرق في العباره يا فندم وإسمه مش في الناجين وممكن يكون كله الحوت وصعب خالص أجيبلك راسه والله, ودمعتين تانيين ..
- الموظف صائحا في وجه المواطن : وإنت إيش عرفك إنه مات ! وهو أي حد يكله الحوت يبقي مات !! إنت مقرتش قصه سيدنا يونس عليه السلام !! إنت عايز تورث أبوك بالحيا وهو في بطن الحوت يا جبان .أغرب عن وجهي أيها الحقير ومتجليش إلا براس أبوك أو بالحوت كله وبصوت مثير للإستفزاز يصيح الموظف - اللي بعده -
يمشي المواطن المسكين متقهقرا وهو لا يعرف أيبكي علي والده الذي مات غريقا أم كرامته التي ذهبت هباءا
يدخل المواطن التالي أو -الباشا-بالبدله المتينه والجزمه الثمينه ويقوم حاطط للموظف ميت جنيه في كوبايه الشاي ويقول له بصوت متعالي ينافس برج القاهره في علوه : طلعلي شهاده وفاه لأبويا يا إبني يا حبيبي
- الموظف يسرع بإنتشال الميت جنيه من كوبايه الشاي وينشفها بسرعه في هدومه قبل ما تبوش ويدخلها في جيبه قبل ما حد يشوفه في حين إن طابور المصلحه كله شايفه ويقول للباشا : إتفضل إستريح يا باشا , هو أبوك عايش في مصر ولا بره ؟
-الباشا : لأ في مصر ويا ريت بلاش أسئله كتير ..
- الموظف آسفا : لا مؤاخذه يا فندم آادي شهاده وفاه أبوك وعمامك كمان ودي شهاده تانيه تثبت إنك الوريث الوحيد ليهم ولو عايز تطلع شهاده وفاه ليك كمان مفيش مانع
-الباشا : لا شكرا يا أخويا , وواخد الشهادات وماشي
- تعالو بينا نعمل مقارنه بسيطه بين المستشفي الحكومي والخاص ..
ده واحد أبوه مغم عليه ومش بيتنفس خالص وده إبنه شايله جاري بيه علي المستشفي الحكومي وبيقول الموظف منهارا أبويا هيموووووووووت أدخله فين ؟
- الموظف الحكومي: تدخله فين ! هي وكاله من غير بواب ؟ روح أقف في الطابور يا فندم وإستني دورك إنت مش أحسن من غيرك في ناس جايه قبل منك
- الإبن صارخا : يا عم طابوووووور إيييه إحنا هنجيب عيش بقولك بيمووووووووت يا عمممم بيموووووت
- الموظف بإبتسامه بارده بلهاء : هاها يا راجل متقولش كده الأعمار بيد الله ومحدش بيموت ناقص عمر إنت مش شايف اللوحه الكبيره اللي متعلقه هناك - مكتوب عليها : قوله تعالي "أينما تكونو يدرككم الموت ولو كنتم في بروج مشيده "-
- الإبن يجري بوالده الذي يحمله صائحا : ربنا ياخدكو يا عالم يا بقر كتكو البلاوي ربنا يخدكو يا كفره أنا هشتكيكو ل ... - يتلعثم أثناء تفكيره إلي من يشكيهم - هشتيكيكو ل.. هشتكيكو لربنا منتو كلكو كفراااااه ويظل يسترسل في الشتائم إلي أن يصل إلي مستشفي خاص ..
يدخل المستشفي حاملا والده ومندفعا علي أمل أن ينقذ أباه ..
- موظف الإستقبال ببروده المعتاد : مساء الخير يا فندم , كان أاي هيلب يو ؟
- الإبن بعصبيه : يا عم إنت هتعملي خواجه النبي عربي يا عم أنا أبويا بيمووت إنت مش شاااايف ؟؟؟
- موظف الإستهبال : طيب إهدي يا فندم نزل أبوك هنا لحد أما أناديله حد يكشف عليه وروح إقفل الباب ده عشان التكيف وإيدك علي تمن التذكرتين إنت والوالد الكريم
- الإبن يترك والده علي الأرض ويترك له تمن -التذكرتين- وهو يسب ساخطا هذا النظام اللعين الذي يشبه نظام الحدائق العامه ويجري بجنون ليغلق الباب عشان التكيف ويرجع ليعلم أن أباه قد تعرض لأزمه قلبيه أثرت علي حالته المعنويه فمات متأثرا بجراحه العاطفيه علي حسب كلام الطبيب ..
- يتظاهر الإبن بالشجاعه محاولا كتم آالامه وأحزانه علي والده إلا إنه يفقدها سريعا عندما يتذكر الذل الذي تعرض له حتي مات أباه ..
-وبيأس الكافرين يحاول أن يحمل الرجل أباه ليصلي عليه ثم يدفنه إلا أنه يتجمع عليه أمن المستشفي كاملا لإنتزاعه منه وترحيله إلي ثلاجه المستشفي التي يقف عليها عددا ضخما من الحراس حتي يتم دفع ثمن الكشف علي والده الذي يتعدي عشرين ألفا من الجنيهات..
- الابن مصعوقا : إزاي أدفع عشرين ألف عشان كشف ؟ إنتو أكيد إتلخبططو في الحساب
- موظف الإستهبال ببروده التقليدي :الحساب سليم يا فندم إنت فاكر نفسك في مستشفي حكومي !,الحساب عشر تلاف جنيه ميني تشارج وخمسه دمغات وخمسه بدل ميراث
- الإبن بهدوء الحزين وبراءه اليتيم : بدل ميراث إيه يا عم حرام عليكو الراجل مكنش عنده غير جاموستين وحمار بقرنين وحته أرض متكملش مترين وتمنهم كلهم ميكملش قرشين , ثم يسأله : هو أنا لو مدفعتش هيحصل إيه ؟
- الموظف : مش هتاخد أبوك
الإبن صائحا متعصبا : ربنا يحرقكو بجاز بطئ الإشتعال يا عالم يا حرميه حتي الميتين سرقتوهم أنا هبلغ عنكو يا ولاد ال .. ويقوم ماشي وعارف إنه مش هيعرف ياخد منهم لا حق ولا باطل ويتوجه يائسا إلي السجل المدني لإستخراج شهاده الوفاه علي أمل أن يحصل علي ورث والده اللي مات وإتسرق سائلا الموظف أن يسترخ له شهاده وفاه والده ..
- وكالعاده يستقبله الموظف الحكومي بسؤاله التقليدي : جبت راسه ؟
- الإبن : لا إتسرقت يا فندم
- الموظف : روح إعمل محضر في القسم وأما تلاقيها إبقي تعالي يا روح خالتك , ثم يصيح :اللي بعده
ويتوجه الإبن بدهشه المصعوق وألام اليتيم المسكين إلي قسم الشرطه ليبلغ عن سرقه والده ويستقبل في القسم عددا من الأقلام علي جبهته يتجاوز عدد جميع الأقلام التي كتب بها في حياته وينتهي به الحال في محكمه مواجها للقاضي الذي يحكم عليه بالإعدام شنقا مع الأشغال الشاقه بتهمه قتل والده من أجل الحصول علي الميراث

Report