فكروا معايا 00000وساعدوني...

السلام عليكم ورحمه الله

زي ما انتو عارفين اني في سنه تالته وعندي 6مواد عاوزين مذاكره
ياريت تقولولي انظم وقت المذاكره ازاي في العشره ايام اللي جايين مع العلم ان عندي امتحان فارما وطبعل انتو عارفين ايه هي الفارما وعواقبها
وامتحان بارا
واحنا خلصنا ماده الالبان 000اما التغذيه ماشيه فيها كويس..والباثولوجي مش قوي...والميكرو اجزاء بسيطه منها هي اللي مذاكراها
ياريت تفيدوني وانصحوني انتوا كلكم اخواتي واكيد حتخافوا عليا وعلي مصلحتي

كل سنه وانتو طيبين

اول واهم نصيحه ليكى
بلاش تقلقى ولا تتعصبى لان العصبيه بتجهد المخ وبتخليكى متعرفيش تذاكرى
ثانيا
روحى اى امتحان نايمه كويس واوعى تروحى سهرانه انا عمرى ما رحت سهرانه وحليت كويس
لازم تدى مخك قسط من الراحه كافى ع الاقل 4ساعات وانا عارفه انك ممكن تستغربى كلامى لكن والله ده حقيقه
اما بخصوص نظام المذاكره
انتى ابداى بالحاجه اللى انتى حاسه انك مش مجمعاها قوى ومحتاجه وقت عشان تركزى فيها ومن وجهة نظرى ان الفارما والبارا اهم لانهم اطول واصعب لكن الباثولوجى بيتوضح فالسكاشن كويس وبتفهمى امراض كتير من شرايح السكاشن
والتغذيه طويله بس سهله بتتفهم مع القرايه البسيطه ومش عايزه حفظ بس هيا طويله شويه
الميلك انا كنت بحبه جدا وكنت شايفه من المواد السهله ومذاكرته مقدور عليها
الميكرو بصراحه كده ومن غير ما تقولى لحد ركزى ع اسئلة الامتحانات والكلام اللى بيقوله د.محمد وائل فالمحاضره وبعدين بصى ع باقى المنهج
وطبعا متنسيش مذكرة الامتحانات عشان تعرفى نوعية الاسئله وبتيجى ازاى وحاولى تفتحيها قبل ما تذاكرى

وفى الاخر متنسيش ربنا وادعى قبل ما تذاكرى انه يرزقك الفهم الجيد وبعد ما تخلصى انه يثبت الكلام ده فدماغك ويرده اليكى عند حاجتك له
وربنا يجعلك من اهل العلم ويرزقك العلم النافع ويكرمك واشوفك من اوائل الدفعه السنه ديه

بجد ربنا يوفقك ويكرمك من وسع حببتى امة الله طبعا مش هقدر افيدك للاسف حببتى لانى اصلا معرفش حاجة من المواد والحمد لله بس الى اقدر اعمله ليكى حببتى الدعاء ليكى وان شاء الله ربنا يستجيب بس اهم حاجة كونى واثقة انى ربنا معاكى ويا رب يهدينى ان شاء الله واعرف انظم كويس لانى الحمد لله كل اعمال السنة بعد العيد وطبعا الحمد لله على المواد يا رب خير يا رب فان شاء الله ربنا يكرم الجميع ونستغل الايام الجاية صح ويا رب ربنا يكرم الجميع ونخرج باحلى فرحة وراحة اننا نهينا المواد يا رب اللهم ااااااااااااااااااااااااااامين

السلام عليكماهم شئ فى الموضوع ده هو الهدوووووووووووووووووووووء التام لانك لو اتنفذت مش هاتنجزى حاجه؟؟؟؟وانت اكتر واحده تعرفى امكانياتك لازم تنظمى وقتك بمعرفتك مش حد تانى اوككل سنه وانتم طيبين

كل سنه وانتم كلكم بخير وسعاده

متشكره لكل واحد حاول يساعدني متشكره ليكي يا وسام وليكي يا محبه الله

ومتشكره لحضرتك يا دكتور سيد
بس يا جماعه محاضرات الفارما طويله ومذاكرتها بحس انها بتضيع وقت كبير دا غير اني مش عارفه ليه بنساها


جزاكم الله كل خير

طبعا يا امه الله بعد كلام د سيد ووسام مفيش كلام يتقال غير انك ملكيش دعوه باى راى مثبط ليكى وخليكى مع نفسك وبصى لنفسك بس وركزى فى المذاكره وما قل ودل وبلاش الزياده واهم حاجه مذكره الامتحانات والاسئله المهمه وكمان هدوءالعصاب مهم جدا جدا جدا لانه بيضيع واهم من ده كله ثقتك بالله وعوات اهلك ليه وثقتك بنفسك وان شاء الله ربنا هيكرمك بالى انتى عاوزاه

طبعا يا امه الله مفيش كلام يتقال بعد دكاترتنا العظماء دول وانا شخصيا بحترمهم وبحسهم قدوه ليا
وبما اني في سنه تالته معاكي وهمي هو همك فربنا معانا جميعا وفعلا اهم حاجه الهدوء وانك تاخدي الموضوع بفهم صدقيني الحاجه اللي باخدها كأنها معلومه عامه كده بتثبت غير لما تحفظيها لل الامتحان وبجد يا جماعه ادعولنا انتوا عارفين سنه تالته

امة الله انتى قلوقة جدا وقلقتينى معاكى اعملى اللى عليكى وخليها ع الله يعنى انا مثلا كنت بطحن الفارما طحن وجبت اتنين مقابيل فى الترمين والاتنين مرفوعين هههههههههههههههه انا طبعا بهزر لانى مكنتش بفتحها بس والله لو رجعت بيا الايام كنت فعلا ذاكرتها لانها فعلا ماده شيقة جدا والوقتى بحاول اذاكرها يعنى بعد ما شاب ودوه الكتاب انتى بس بلاش قلقك الملحوظ وبس اعملى اللى عليكى وعموما الفارما دى محتاجه فهم اكتر من الحفظ والتركيز ع الحاجات المهمه مش مذاكرة ثانويه عامه وربنا يوفقك

السلام عليكم و رحمة الله

عندما كنت طالبا مثلكم كنت بأخذ المواد اللى فيها أسماء كثيرة مثل الفارما و البارا باهتمام شديد جدا بمعنى مذاكرة أول مرة بتركيز مش حفظ و ترتيب المعلومة و ربطها بشئ عندي (شخصي أو غيره) ده بيساعد كثيرا في بقاء المعلومة في الذاكرة.
و كذلك ربط المواد مع بعض ده بيساعد على التذكر بسرعة.
ولما يحصل النسيان و ده طبيعي جدا كنت لا أقلق لأنى متأكد ان المعلومة موجودة لكن عاوزة تنشيط ليس الا

و الله الموفق

قلبتى علينا المواجع والله ربنا معانا ويعيدها عل خير السنة دى وبعدين ياناس امتحان ايه ده احنا لسة راجعين من العيد والواحد مفقش من الفتة والذى منو ....بس اهو هنعمل ايه ..قدرنا وسمعنى سلام وتانى تانى تانى راجعين للهم تانى
انا طبعا مش عارف اقوللك ايه لانى الحال من بعضو ......لا ده كمان يمكن انا كلهم زى الميكرو كده حتت بسيطة
وكل اللى اقدر اقولهولك يادكتورة انى احنا لازم نذاكر الحاجات المهمة بس ....يعنى بين قوسين كده ....الزتونة بتاعت الموضوع بس ...وربنا معانا

السلام عليكم
انا بشكركم كلكم ونفسي بجد ربنا يعدي السنه دي علي خير
وشكرا ليكي يا ساره ولحضرتك د/حازم
وطبعا للدكتور اللي قالي اني قلوقه انا فعلا كده بس اعمل ايه ربنا يهديني ويكرمكم اجمعين

د/عمرو خلاص بقي وقت الفته خلص وشكلها حنطلع علينا في الامتحانات

وان شاء الله نجيب كلنا تقديرات عاليه