((أسف على الجرأه))بخون جوزى ومستعده اتحدى الدنيا

من طرف **Dr.A.MATRIX** الخميس 17 ديسمبر 2009, 2:45 pm

بسم الله الرحمن الرحيم

اتمنى من كل الاعضاء تسامحني على الموضوع ده ان كان فيه شوية جرائه بس
انا بصراحه قريت المشكله دى وحبيت اشوف رايكم ايه

هى بصراحه مش مشكله هى كارثه بكل المقاييس

اخلاقيه اجتماعيه دينيه

بجد مش عارف اوصفلكم حالتى لما قريت الموضوع

حاجه بجد مقرفه هسيبكم مع الموضوع

أنا عايزة حد يساعدني، أنا عندي مشكلة مش من السهل إني أتكلم فيها أصلا؛
بس غصب عني أنا متدمرة ونفسيتي ضايعة.. أنا متجوزة من 7 شهور؛ بس مش عن
حب؛ بس هو بيحبني جدا، ونفسه يعمل أي حاجة ترضيني وتخليني بس ابتسم؛ لكن
أنا للأسف مش قادرة أدي له أي حاجة؛ بالعكس خنته مع الشخص اللي أنا بحبه
من 7 سنين اللي هو كمان متجوز بس مراته تعبانة وعنده مشاكل..

بقينا نتقابل كتير في السر طبعا لما البيت عنده بيبقى فاضي، وكل مرة
باسيبه فيها أحس بالذنب والقرف من نفسي؛ بس غصب عني، مش قادرة أبعد عنه،
بحبه بحبه أوي بشكل ما فيش حد ممكن يتخيله، وللاسف هو مش بيقدّر ده كتير،
وبييجي عليّ في حاجات كتير، ونبعد كتير بس يرجع تاني ويقول لي بحبك وما
اقدرش أعيش من غيرك وأنا أكيد بابقى مستنية بس إني أسمعها منه وأطمن إنه
مش ناسيني..

المهم إن الكارثة اللي حصلت إني اكتشفت إني حامل منه، ودي في حد ذاتها
طبعا مصيبة؛ بس هتستغربوا لو قلت لكم إني مبسوطة أوي بيه، ومش عايزة أعمل
أي حاجة تضيّع الحمل ده مني، إحساسي إن فيه جزء منه جوايا مخليني ناسية كل
حاجة ومستعدة اتحدي الدنيا كلها عشانه؛ مع العلم إني مش باخلي جوزي يكمل
معايا اللي ممكن يخليني أبقى حامل منه لأني مش حاسة إني عايزة ده منه.

أنا ارتبطت بيه في فترة بعدت أنا والإنسان اللي بحبه مدة طويلة، وعرفت إنه
خطب، وعنداً فيه وافقت على أول عريس جالي، وكان ابن خالتي، قلت أكيد هحبه
بعد الجواز، كل الناس قالت لي كده، وهو حد محترم جدااااا؛ لكن للأسف ما
حسيتش أي حاجة ناحيته؛ بالعكس كرهت العلاقة معاه، وبقيت أبكي بالدموع
بعدها، وندمت، والحياة بيننا روتينية وجافة بشكل صعب جدا حد يتحمله.

والشخص اللي بحبه اتجوز بنت خالته -الله يشفيها- اتضح إن عندها مرض في
المخ، الله يشفيها يارب ويعافينا، وهو فكر إنه يتجوز عليها أو يطلقها إذا
ما قبلتش لأن فرصة الحمل عندها ضعيفة جدا؛ بس قال هيستنى شوية يمكن يكون
فيه أمل في علاجها، وبلاش يظلمها..

وعشان كل الظروف دي اللي عندي وعنده رجعنا لبعض واحتاجنا لبعض؛ بس أنا
دلوقتي مش عارفة أعمل إيه؟ هو أول ما عرف موضوع الحمل بقي هيتجنن ومش عارف
يعمل إيه وقال هيجيب دوا عشان أنزّل الجنين لأنه لسه أصلا ما كملش أسبوعين
وأنا كأني اتلجمت، كان عندي أمل إنه يقول لي تطلّقي ونتجوز بعد 3 شهور
عادي، وكأن الطفل هينزل 7 شهور مثلا؛ بس لأننا كنا هرّجنا على الموضوع ده
بالصدفة قبل كده، ولما حصل بجد كنت متخيلة إنه هيقول لي كده وأعيش أخيرا
مبسوطة وسعيدة مع بني آدم بحبه، وعايزة أعيش معاه بقية حياتي وجزء منه
ملازمني..

أي واحدة في مكاني كانت هتعمل أي حاجة عشان تنزل الطفل ده، وتبقى هيا اللي
بتلح أكتر، مش هو لأن فضيحة وكارثة ليها؛ بس أنا أقسم بالله غصب عني مش
قادرة أحس غير إني عايزاه، ومش عارفة أقول له كده، خايفة أسمع منه كلام
يبقى نهايتي..

أرجوكم حد يساعدني، حد يرد عليّ، قولوا إني مش محترمة، وما عنديش أخلاق
ولا تربية ولا دين؛ بس حد يساعدني، أنا باتقطع من جوة، وعارفة إن ذنبي
كبيييييييير أوي؛ بس غصب عني. والله العظيم أنا عارفة إن ربنا غضبان عليّ؛
بس عندي أمل أعيش مبسوطة في يوم من الأيام في رضاه.. آسفة للإطالة

حد يقولى ازاى حد يفرط فى نفسه حد حد يرضى بالخطيئه لابعد مدى

عاوزه اعرف رايكم