القطط

القطــط طبعــاً
أنا: بارك لي
هو: الف مبروك يا عم بس على ايه؟؟
أنا: القطة ولدت
هو: القطة ولدت؟؟
أنا: ايوه قطة من اللي عندنا ولدت.. خلّفت قطة صغيرة شكلها جميل اوي
هو: تصدق انك فاضي؟
أنا: ليه بس؟
هو: بقى الناس مش لاقية تاكل وانت مربي قطط؟؟
أنا: طب وفيها ايه لما اربي قطط، وايه علاقة تربيتي للقطط وبين اكل الناس؟
هو: الله؟؟ مش انت بتجبلهم افخم الاكل واغلاه؟؟؟ كل اللي بيربي قطط بيعمل كده
أنا: ليه يا عم هو انت شايفني جاي منين؟؟؟ من امريكا؟؟ ولا اوروبا؟؟ دا القطط اللي عندي بترضى والله بالموجود.. يعني لما بيغلبها الجوع ما بتقولش لا.. ده اول امبارح اتبقّى حبة ملوخية خضرة من الاكل واحنا التلاجة بتاعتنا بايظة ما بتسقعش الاكل.. بتعمل بس صوت يديك ايحاء انها تلاجة.. قلت بدل ما يبوظوا ويحمضوا احطهم للقطط
هو: ورضيوا ياكلوهم؟؟
أنا: ياكلوهم؟!! دول كان شوية كمان وياكلوني شخصيا
هو: اول مرة اعرف ان القطط ممكن تاكل ملوخية
أنا: ملوخية وكوسة وبسلة ومكرونة واي طبيخ المهم بس مايكونش فيه شطة.. وعندنا قط بيحب ياكل بصل اخضر اوي.. احنا نعتبر ما بنرميش اكل في الزبالة زي ما غيرنا بيعمل
هو: طب ما تدي الاكل ده لاي انسان جعان
أنا: اولا الاكل بيبقى قليل جدا ومش هايكفي انسان حتى لو كان طفل صغير.. وكمان انا سمعت ان الانسان ممكن يُثاب على اطعامه لاي روح بمعنى انه لو اطعم كلب جعان مثلا او قطة دا بيبقى في ميزان حسناته.. انت ما سمعتش قصة الراجل اللي دخل الجنة علشان شرّب كلب كان عطشان؟؟ ولا الست اللي دخلت النار علشان حبست قطة وما اكلتهاش ولا حتى سابتها تاكل نفسها من اي حته؟؟؟ دا الاسلام امرنا بالرحمة بالحيوانات
هو: طب لو انتوا اكلتوا الاكل كله ومافيش حاجة اتبقت للقطط بتعملوا ايه؟؟
أنا: بنجيب رجول فراخ من عند بتوع الفراخ ونسلقها لهم
هو: وبتشتروها بكام بقى؟
أنا: لا دا احنا بناخدها ببلاش من البياعين
هو: طب ما قلتليش القطة شكلها ايه؟؟؟
أنا: لونها ابيض في اسود مع ان ابوها وامها بيض.. بس يمكن تكون طالعة لجدها اصله كان زنجي.. اسود يعني
هو: ولا يمكن امها لعبت بديلها.. هاهاهاها
أنا: ابدا دي قطة بنت حلال.. انت اللي نيتك وحشة ولا انت فاكر ان القطط زي البني ادمين؟؟؟
هو: ازاي؟
أنا: القطط لما بتتجوّز.. فاهم قصدي.. بتتجوز من نفس العيلة وما بتخليش اي قط غريب يقرب منها وبتحصل خناقات عنيفة في عالم القطط بسبب الموضوع ده.. اما في عالم البشر تلاقي الانحلال منتشر والزنا مقنّن.. يعني مباح.. في بعض الدول.. بذمتك مين احسن.. الناس دي ولا القطط؟؟؟
هو: القطط طبعاً
*******

السلام عليكم
شكرا وسام