اول موضوع ليا ( ما تقلقش بعد التخرج ) هام جدا

زملائى طلبه كليه طب بيطرى جامعه قنا . دا اول موضوع ليا فى المنتدى باذن الله ولانى كنت فى الكليه من 3سنين ونصف وعارف الطلبه بتقول ايه /
1- احنا مش بناخد حاجه فى الكليه يبقى هنطلع نشتغل ازاى .
2- قنا مش معترف بيها بين الجامعات الاخرى يبقى هتكون لينا فرصه عمل ازاى وسط الجامعات الاخرى مثل اسيوط وغيره .
3- طيب انا ما بحبش الادويه وفرصتى الوحيده افتح معرض او اشتغل بيطرى او اعمل مشروع وانا ما اتعلمتش اى حاجه من دول فى الكليه والشغل معظمه نظرى دا ان اخدنا النظرى كله .

مش دا الكلام اللى بيدور فى عقلك لما تقرب تتخرج وخاصه فى سنه خامسه لما تصطدم بالواقع ولما والدك يقلك يلا يا ريس قدامك كام شهر وتتخرج وهتطلع تشيل المسئوليه وهنا هتفوق على الجمله دى ( ياااااااااااااااه دانا ليا خمس سنين بروح واجى ومش فى بالى الشغل خالص . طيب هل انا جاهز للشغل ؟ طيب هل هو فيه فرص عمل ليا ؟ كل دا بيدور فى دماغك وحسيت فى لحظات بالاكتئاب وفقدان الامل . وفجاءه انطويت على نفسك وحزنت . وانت منحصر على نفسك ربنا بعتلك صديق همس فى ودنك . ما تقلقش . انت بايدك تصنع فرصك بنفسك . ازاااااااااااااااااااااااى . اقلك انا ازاى .
دى بدايه قصتى مع الشغل والكليه والتخرج . وخرجت الى مصير محتوم وهو الجيش ودخلت الجيش عسكرى وزعلت جدا واتوزعت على مزرعه ابقار فريزيان وجاموس بجميع انواعه ( حلاب وتسمين ) وبدات اتعلم بالضروره لان دا جيش ولقيت ان الامور كلها بايدى . لان ما حدش المفروض يعرف حاجه فى الطب غيرى . ودعمت نفسى بالكتب النظريه العمليه فى جميع الاقسام من باطنه ومعديه وولاده وجراحه وتربيه وبدات اطبق كل اللى اقراه على الحيوانات المهوله فى المزرعه وبدات اعلم نفسى بنفسى واشتغلت ولاده بكل مشاكلها وجراحه باغلب انواعها وباطنه ومعديه واتبعت اساليب رعايه للحيوانات العشار والحلاب وكذلك برامج تسمين للعجول وبدات اخد خبره ومن فضل الله انى كل فتره كنت اروح مزرعه اغنام ومزارع تسمين الدجاج كانت بجوار مزرعتى فكنت اروح اتعلم . وقضيت الجيش كله احصل واطبق كل ما اقراه فى الكتب واعمل مقارنات واطبق حاجات جديده مش موجوه فى الكتب . وعدت سنه الجيش واخدت خبره بيحتاجها الطبيب برا فى 10 سنين .
واول ما طلعت قلت افتح عياده مع ان ناس حزرتنى من صغر السن وقله الخبره . لكنى قلت لنفسى انا مش قليل الخبره بل انى اكتسبت خبره فى الجيش وكنت بطلع قوافل كتييييييييير قبل كدا . ثانيا وضوع الصغر دا اقضى عليه بكفائتى وسمعتى وسط الناس .
وكان الامر بفضل الله واستفلت فلوس العياده لانى كنت ابيض يا ورد واشتغلت والدنيا مشيت معايا بلسانى الحلو مع الناس وتخفيض الكشوفات والشغل بضمير ورديت الفلوس اللى استلفتها وبدات اكون فلوس . فى نفس الوقت كنت قدمت على الشغل فى الحكومه وعملت الانتر فيو واتقبلت الحمد لله لان الجيش برده ساعدنى انى اعرف اجاوب على اسئله ناس ما عرفتش تجاوب عليها بسبب قله الخبره .
والعياده مع الحكومه مع الخروج فى حالات بدات الدنيا تمشى معايا . وقلت لازم اعمل مشروع يدعم دا كله وبحثت كويس واستفتيت قلبى وعملت مشروع الارانب اللى بدا ب20 ام وانتهى ب .......... ( بلاش علشان الحسد ههههههههههههههه ) بعدد حلو الحمد لله وبعد كدا سوق الشغل اخدنى وبقيت بشترى للناس مواشى وباخد اجرى وبشرف على معالف تسمين . كل دا ربنا اكرمنى بيه فى سنتين ونصف فقط بعد خروجى من الجيش .

لذلك نصيحه اصنع مستقبلك بنفسك .واطلع ابحث وجازف واتكل على الله وهتلاقى ربنا يعينك . وهتتعب فى الاول لكن بعدين هترتاح .

يلااااااااااا قول معايا . انا مش خايف انى ادخل الجيش ولو ما دخلتش حتى برده هتدرب على الفيلد اللى هيفتحلى مجالات عمل فى الفيلد وخارجه برده وفى الفتره اللى هكون بجهز نفسى لشغل الفيلد هعمل مشروع صغير ويكبر معايا واكبر معاه ويساعدنى فى الفتره اللى بتدرب فيها .

يلااااااااااااااا عاوز اسمع منك بتقولى . انا مش خايف من مستقبلى مدام هعمل اللى عليا . انا طالعلك يا ظروف ومش هتغلبينى وانا اللى هغلبك باصرارى وطموحى .

وربنا يوفقكم جميعا لما يحب ويرضى .
واى انسان فيكم هيحتاج مساعدتى انا تحت امره فى كافه مجالات العمل .
ودا رقمى 0100577873
ودا اميلى [ندعوك للتسجيل في المنتدى أو التعريف بنفسك لمعاينة هذا الرابط]
ودا موقعى الخاص [ندعوك للتسجيل في المنتدى أو التعريف بنفسك لمعاينة هذا الرابط]
ودا موقعى التانى BAITARYQENA.YOO7.COM

وربنا يوفقنى واياكم .

شكرا
د/وليد

ع فكرة انا مش هقول انى دخلت بيطرى بمزاجى او انى عاوزاها ولغايه السنه ال فاتت دى ربنا يعلم كنت بكرة الكليه دى اد ايه وببكى كمان انى دخلتها
بس لما دخلت رابعه بجد انا دلوقتى بحمد ربنا اوى لانها اد ايه هى كليه امورة ومفيش حاجه اسمها مفيش شغل ال هيتعب هيلاقى وال هيدور ع شغل طبعا هيشتغل بس مننساش نكون اد الشغل دة


اللى خلانى اغير رايى حكمه سمعتها وبجد دى غيرتنى وغيرت فيا حاجات كتير اوى جوايا وهى *كن انت التغيير الذى تريد ان تراه فى الكون*


شكرا جدا دكتور وليد ع التوبيك الامور ده ربنا يكرمك

شكرا اوي يا دكتور وليد علي كلام حضرتك ده وانا الحمد لله مقتنعه بكده اوي
وبحب الانسان الطموح اللي زي ما بيقوله بيحفر في الارض لغايه ما يبني نفسه ويبني مستقبله

مشكووووور أوى د/وليد ع المعلومات القيمه دى .. بس تصدق أنى لسه مقلق :D